ПРОКУРОР ТӨР, НИЙТИЙН АШИГ СОНИРХЛЫГ ХЭРХЭН ХАМГААЛДАГ ВЭ?

Ховд аймгийн прокурорын газраас хүний эрхийг хамгаалах, илэрсэн зөрчлийг арилгуулахаар тухайн газруудад прокурорын мэдэгдэл хүргүүлж, холбогдох хууль тогтоомжийн талаар сургалт хийсэн байна.

Ховд аймгийн Булган сум дахь сум дундын прокурорын газраас тус аймгийн Алтай, Мөст, Цэцэг сумдын төрийн байгууллагын алба хаагч, иргэдэд энэ оны 1 дүгээр сараас хэрэгжиж эхэлсэн Эрүүгийн болон Зөрчлийн тухай хуульд орсон нэмэлт өөрчлөлтийн талаар мэдээлэл өгчээ. Энэ хүрээнд тээврийн хэрэгсэл жолоодох эрхээ хасуулсан хүн согтуурсан, мансуурсан үедээ тээврийн хэрэгсэл жолоодсон, эсхүл согтуурсан, мансуурсан эсэхийг зохих журмын дагуу шалгуулахаас зайлсхийсэн тохиолдолд хүлээлгэх эрүүгийн хариуцлага, цахим орчинд үйлдэгдэж буй залилах гэмт хэргийн нөхцөл байдал, түүнээс урьдчилан сэргийлэх чиглэлээр яриа, таниулга хийсэн байна.

Ховд аймгийн хэмжээнд хүүхэд хохирсон болон холбогдсон гэмт хэрэг, зөрчлийн гаралт сүүлийн жилүүдэд өссөн байна. Тухайлбал, 2023 онд хүүхэд хохирсон гэмт хэрэг 57 гарсан нь өмнөх оноос 39 хувиар, тэр дундаа хүний бэлгийн эрх чөлөө, халдашгүй байдлын эсрэг гэмт хэргийн улмаас хүүхэд хохирсон тохиолдол 60 хувиар өсжээ.  

Ховд аймгийн прокурорын газраас төр, нийтийн ашиг сонирхлыг хамгаалах чиглэлээр тус аймгийн 17 сумын “Сум хөгжүүлэх сан”-тай хамтран ажиллаж байна.